छत्रपती संभाजीनगर जिल्हयाकरिता दिनांक ०९ ते १३ ऑगष्ट २०२५ साठी हवामान अंदाज व कृषिहवामान सल्ला

 

प्रादेशिक हवामान केंद्र, मुंबई येथून प्राप्त झालेल्या अंदाजानूसार छत्रपती संभाजीनगर जिल्हयात पुढील पाच दिवसात हवामान ढगाळ राहून तुरळक ठिकाणी हलक्या ते मध्यम स्वरुपाच्या पावसाची शक्यता आहे. तसेच कमाल तापमान ३२.० ते ३४.० अंश सेल्सिअस आणि किमान तापमान २२.० ते २३.० अंश सेल्सिअस दरम्यान राहील व सापेक्ष आर्द्रता ६३ ते ८६ टक्के राहील तर वाऱ्याचा वेग ०९ ते १४ किमी/तास राहण्याची शक्यता आहे.

सतर्कता : छत्रपती संभाजीनगर जिल्ह्यात दि. ०८ ऑगष्ट २०२५ दरम्यान तुरळक ठिकाणी वादळीवारा, विजेच्या कडाकडाटासह हलक्या ते मध्यम स्वरुपाच्या पावसाची शक्यता असुन वा-याचा वेग जास्त (३० ते ४० किमी/तास) राहील.

विस्तारित अंदाजानुसार (ईआरएफएस) छत्रपती संभाजीनगर जिल्हयात दि. १३ ते १९ ऑगष्ट २०२५ दरम्यान आकाश ढगाळ राहील.तसेच पर्जन्यमान सरासरीपेक्षा जास्त तर कमाल तापमान सरासरीपेक्षा कमी व किमान तापमान सरासरीऐवढे राहण्याची शक्यता आहे. 

 कृषि हवामान सल्ला

ऊस

वाढीची अवस्था

मागील आठवड्यातील पाऊस व ढगाळ वातावरणामुळे ऊस पिकामध्ये पांढ-या माशीचा प्रादुर्भाव दिसून येत असून याच्या व्यवस्थापनासाठी डायमिथोएट ३० टक्के ईसी ३६ मिली प्रति १० लीटर पाण्यात मिसळून स्वच्छ वातावरणात फवारणी करावी. तसेच बऱ्याच ठिकाणी ऊस पिकामध्ये हुमणी अळीचा प्रादुर्भाव दिसुन येत असुन याच्या व्यवस्थापनासाठी मेटारायझियम ॲनिसोप्ली या उपयुक्त बुरशीचा ०४ किलो प्रति एकर या प्रमाणात जमिनीतून वापर करावा. तसेच फिप्रोनील ४० टक्के + इमिडाक्लोप्रीड ४० टक्के ०४ ग्रॅम प्रति १० लीटर पाण्यात मिसळून आळवणी करावी.

कापूस

फांद्या लागणे ते पाते धरणे अवस्था

कापुस पिकामध्ये आकस्मित मर दिसुन येत असल्यास याच्या व्यवस्थापनासाठी युरिया १.५ किलो + पांढरा पोटॅश १.५ किलो + कॉपर ऑक्सिक्लोराईड २५० ग्रॅम प्रति १०० लिटर पाण्यात मिसळुन तयार द्रावण १०० मिली प्रती झाड याप्रमाणे आळवणी करावी किंवा पोटॅशिअम नायट्रेट (१३:००:४५) १ किलो + कोबल्ड क्लोराईड २ ग्रॅम + कॉपर ऑक्सिक्लोराईड २५० ग्रॅम प्रति २०० लिटर पाण्यात मिसळुन तयार द्रावण १०० मिली प्रती झाड याप्रमाणे आळवणी करावी.   

मका

वाढीची ते फांद्या लागणे अवस्था

मका पिकावरील लष्करी अळीचा प्रादुर्भाव ओळखन्यासाठी एकरी २० कामगंध सापळे लावावेत. तसेच प्रादुर्भाव दिसुन येत असल्यास व्यवस्थापनासाठी ५ टक्के निंबोळी अर्काची किंवा अझाडिरॅक्टिन १५०० पीपीएम ५० मिली प्रति १० लिटर पाण्यात मिसळून स्वच्छ वातावरणात फवारणी करावी. तसेच प्रादुर्भाव जास्त असल्यास इमामेक्टीन बेन्झोएट ५ टक्के एसजी ४ ग्रॅम किंवा स्पिनेटोरम ११.७ एससी ४ मिली किंवा क्लोरॅनट्रानिलीप्रोल १८.५ टक्के एससी ४ मिली प्रति १० लिटर पाण्यात मिसळून स्वच्छ वातावरणात फवारणी करावी. फवारणी करत असताना किटकनाशक पोंग्यात पडेल अशाप्रकारे फवारणी करावी.

तूर

वाढीची अवस्था

तुर पिकातील अंतर मशागतीचे कामे करून घ्यावीत व पीक तण विरहित ठेवावे व पीक ५० ते ५५ दिवसाचे झाले असल्यास पिकाच्या मुख्य फांद्यांचे शेंडे २ ते ३ इंचापर्यंत खुडावेत. तसेच मागील आठवड्यातील ढगाळ व दमट वातावरणामुळे तुर  पिकावर पाने गुंडाळणाऱ्या अळीचा प्रादुर्भाव दिसुन येत असुन याच्या व्यवस्थापनासाठी इमामेक्टीन बेन्झोएट ५ टक्के एसजी किंवा थायामेथोक्साम २५ टक्के डब्ल्युजी  ४ - ५ ग्रॅम प्रति १० लिटर पाण्यात मिसळुन स्वच्छ वातावरणात फवारणी करावी.

मूग/उडीद

शेंगा धरणे ते दाणे भरणे

मागील ढगाळ वातावरणामुळे मुग/उडीद पिकावर पाने खाना-या अळींचा प्रादुर्भाव दिसून येत असुन याच्या व्यवस्थापनासाठी क्विनॉलफॉस २५ ईसी ३० मिली किंवा थायोडिकार्ब ७५ डब्ल्यू. पी. १.५ ग्रॅम प्रति १० लिटर पाण्यात मिसळून स्वच्छ वातावरणात पावसाची उघाड बघुन फवारणी करावी.

सिताफळ

फळधारणा ते फळ वाढीची अवस्था

सिताफळ बागेत तण व्यवस्थापन करावे. तसेच फळांच्या वाढीसाठी १९:१९:१९ विद्राव्य खत ३ किलो प्रति एकर ड्रीपव्दारे  किंवा पाण्यात मिसळून आळवणी करावी.

भाजीपाला

फुलधारणा ते फळधारणा

मागील आठवड्यातील ढगाळ वातावरणामुळे वांगी पिकामध्ये शेंडा व फळ पोखरणाऱ्या अळीचा प्रादुर्भाव दिसुन येत असुन याच्या व्यवस्थापनासाठी क्लोरोपायरीफॉस २० ईसी १५ मिली किंवा पायरिप्रॉक्झीफेन ५ ईसी + फेनप्रोपॅथ्रीन १५ ईसी १० मिली प्रति १० लिटर पाण्यात मिसळुन स्वच्छ वातावरणात फवारणी करावी.

पशुसंवर्धन

पावसात भिजल्यामुळे शेळ्या व मेंढ्याना सर्दी झाली असल्यास त्यांच्या नाकामध्ये सकाळ व संध्याकाळ दोन थेंब निलगिरीचे तेल टाकावे.

इतर

शेतकरी बांधवांनी फवारणी करताना नेहमी अंगरक्षक कपडे, हातमोजे, चष्मा, मास्क, टोपी, गनबूट, इत्यादीचा वापर करावा व संपूर्ण शरीर झाकले जाईल याची काळजी घ्यावी.

सर्व शेतकरी बांधवांकरीता त्यांच्या शेतातील पीकांवरील बुरशींचे तसेच पीकातील खत व्यवस्थापनासाठी आवश्यक असणारे जैविक बुरशीनाशके (बायोमिक्स) व जैविक खते (बायोफर्टीलायझर) निविष्ठा कृषि विज्ञान केंद्र, पैठण रोड, छत्रपती संभाजीनगर येथे विक्रीकरीता उपलब्ध आहेत.

सदर कृषि सल्लापत्रिका वसंतराव नाईक मराठवाडा कृषि विदयापीठ, परभणी अंतर्गत असलेल्या जिल्हा कृषि हवामान केंद्र (DAMU), कृषि विज्ञान केंद्र, छत्रपती संभाजीनगर-१ येथील तज्ञ समितीच्या शिफारशी वरून तयार करून प्रसारित करण्यात आलेली आहे.